ဂျူးတွေတည်ခဲ့တဲ့ မြန်မာပြည်ကမြို့

ရှမ်းပြည်နယ်မှာ ရှေးယခင် နှစ်ပေါင်းများစွာအတွင်းက အစ္စရေးနိုင်ငံက ဂျူးလူမျိုးတွေ တည်ခဲ့တဲ့ မြို့ဟောင်းတစ်ခုတည်ရှိပါတယ်။ ဂျူးတွေဟာ မြို့တည်ပြီးချိန်မှာ တောင်ထိပ်ပေါ်ကနေ ရေကန်ကြီးတည်ဆောက်ပြီး တစ်မြို့လုံးကို ရေပေးဝေရေးစနစ်နဲ့ ဖြန့်ဖြူးခဲ့တာ ဖြစ်တဲ့အတွက် ဂျူးတွေရဲ့ ဉာဏ်ပညာအစွမ်းကိုလည်း လက်ဖျားခါရပါတယ်။ ရေကန်ကြီးဟာ အခုထက်ထိ တည်ရှိနေပြီးတော့ ရေကန်အောက်မှာဆောက်ထားတဲ့ ဂျူးရှေးဟောင်းအိမ်များ၊ အရာရှိအိမ်ရာများကို ယနေ့ထက်တိုင် မြင်တွေ့ရမှာဖြစ်ပါတယ်။

အဲဒီနေရာကတော့ ရှမ်းပြည်နယ် တောင်ပိုင်းမှာရှိတဲ့ နမ့်စန်မြို့ (Namsang) လေးပဲ ဖြစ်ပါတယ်။ နမ့်စန်ကို ရှမ်းလိုခေါ်မယ်ဆိုရင် မှားနိုင်စရာ မရှိဘူးလို့ ရှမ်းတွေကဆိုကြပြီး ရှမ်းပြည်နယ်မှာ နာမည်တူသော မြို့လေးတွေ အများကြီး တည်ရှိနေတာလည်း ဖြစ်ပါတယ်။
တည်နေရာ

ရှမ်းပြည်နယ် မြို့တော်တောင်ကြီးကနေ သွားမယ်ဆိုရင်တော့ မိုင်ပေါင်း ၇၃ မိုင်ကွာဝေးပြီး ကားနဲ့သွားမယ်ဆိုရင် ၃ နာရီ (မိနစ် ၁၈၀) ခန့် ကြာမြင့်နိုင်ပါတယ်။

တောင်ကြီးကနေ ဟိုပုံး၊ မိုင်းပွန်၊ လွိုင်လင်မြို့တို့ကို ဖြတ်ကျော်လာရပြီးတော့ တောင်သုံးတောင်ကို ကျော်ဖြတ်ရပါတယ်။ မိုင်းပွန်တောင်၊ လွိုင်လင်တောင်နဲ့ နမ့်စန်တောင်တို့ကို ကျော်ဖြတ်ရတာပါ။ လွိုင်လင်တောင်ဟာ အလွန်လှပပြီးတော့ လွိုင်လင်အဝင် ဗျူဟာကုန်း ဖုန်းတိုင်ကနေ ကြည့်မယ်ဆိုရင် တစ်ဖက်မှာ မိုင်းပွန်၊ တောင်ရဲ့ အခြားတစ်ဖက်ခြမ်းမှာ လွိုင်လင်မြို့ကို မြင်တွေ့ရမှာ ဖြစ်ပါတယ်။ သုံးထပ်ကွေ့ရဲ့အလှ၊ မိုင်းပွန်ရဲ့စိုက်ကွင်း၊ လယ်ကွင်းတွေအလှ၊ လွိုင်လင်မြို့အလှကို တောင်ပေါ်မြင်ကွင်းတွေကနေ ရှုမြင်ခံစားနိုင်မှာဖြစ်တယ်။ နမ့်စန်တောင်ကနေ ကြည့်မယ်ဆိုရင်လည်း အင်မတန်လှတဲ့ မြင်ကွင်းတွေ ခံစားနိုင်ပါတယ်။

အင်္ဂလိပ်တို့ဟာ ၁၈၉၀ ပြည့်နှစ်မှာ မြန်မာနိုင်ငံကို သိမ်းပိုက်လိုက်ချိန်မှာတော့ အင်္ဂလိပ် လက်အောက်ကို ပထမဆုံးခိုလှုံတဲ့ စော်ဘွားက လဲချားစော်ဘွား ဖြစ်ပါတယ်။ လဲချားစော်ဘွားဟာ အင်္ဂလိပ်ဘုရင်တွေကို ထောက်ခံသောအားဖြင့် အင်္ဂလိပ်အလံတော်ကို အစဆုံး အလံထူတဲ့ စော်ဘွားဖြစ်တဲ့အတွက် ဘုရင်မကြီးက ရှမ်းပြည်ကို လမ်းတွေဖောက်ပေးပြီး လက်ဆောင်ပေးခဲ့တာ ဖြစ်ပါတယ်။ အင်္ဂလိပ်တွေ ဖောက်ခဲ့တဲ့လမ်းတွေကို ယခုအချိန်အထိ နှစ်ပေါင်း ၁၀၀ ကျော်တိုင်အောင် ကြာမြင့်တဲ့အထိ သုံးစွဲနေတုန်းပဲ ဖြစ်ပါတယ်။

ဒါ့အပြင် အင်္ဂလိပ်တွေ ဆောက်ခဲ့တဲ့လမ်းတွေဟာ တံတားတစ်ခုမှ မထိုးဘဲနဲ့ တောင်တွေကိုဖြတ်ပြီး ဖောက်ထားတာ အင်မတန် အတုယူဖို့လည်း ကောင်းပါတယ်။

တောင်ကြီးကနေ မိုင်းပွန်၊ လွိုင်လင်နဲ့ နမ့်စန်လမ်းပိုင်းတွေဟာ တောင်ကြားလမ်းတွေဖြစ်တဲ့အတွက် အင်မတန် အန္တရာယ်များပါတယ်။ တောင်ကြားတွေမှာ တောင်ကမ်းပါးရံ ကာကွယ်နေတဲ့အတွက် တစ်ဖက်ကယာဉ်ကြောကို ရုတ်တရတ် လှမ်းမမြင်ရပါဘူး။ လမ်းတွေကတော့ ယနေ့အချိန်ထိကို ပြင်နေရတုန်းပါပဲ။ အဆိုးဆုံး နှစ်နေရာရှိပါတယ်။ ဟိုပုံး ထမ်စန်းဂူက ရွှေတိဂုံပုံတူ ဘုရားစေတီကို လှမ်းဖူးမြင်ရတဲ့ ပထမလမ်းကျဉ်း၊ နောက်တစ်နေရာကတော့ မိုင်းပွန်အဝင်နားက ဒုတိယလမ်းကျဉ်းကတော့ အတော်ဆိုးပါတယ်။ ကားတစ်စီးစာပဲ ဖြတ်သန်းစရာရှိပြီး အမြဲတမ်းလိုလို တောင်ဖြိုပြီး ပြုပြင်နေရတဲ့ နေရာတစ်ခုလည်း ဖြစ်ပါတယ်။
ဂျူးတွေတည်ခဲ့တဲ့ မြို့လေး

နမ့်စန်မြို့ကို ဂျူးလူမျိုးတွေ တည်ခဲ့တယ်လို့ သမိုင်းကြောင်းတွေအရ သိရပါတယ်။ နမ့်စန်တောင်ထိပ်မှာ ရေကန်ကြီးတည်ရှိပြီးတော့ တစ်မြို့လုံးရေပေးဝေရေးကို တောင်ထိပ်ကနေ ဖြန့်ဖြူးပေးနေတာ ဖြစ်ပါတယ်။ အောက်နားလေးက ရပ်ကွက်တွေမှာလည်း လျှာထိုး သစ်သား အိမ်လေးတွေနဲ့ တည်ဆောက်ထားတဲ့ ဂျူးလူမျိုးတွေရဲ့ အိမ်တွေလည်း အစီအရီတည်ရှိနေပါတယ်။ အရာရှိတန်းလျားနဲ့ ဝန်ထမ်းအိမ်ရာတွေကို အခုချိန်အထိ တည်ရှိနေတာ ဖြစ်ပါတယ်။

ဒါ့အပြင် နမ့်စန် နဲ့ ပင်လုံနားတစ်ဝိုက်မှာ ယင်းနက်လူမျိုးလို့ခေါ်တဲ့ ရှမ်းမျိုးနွယ်စုတွေ နေထိုင်ကြတဲ့အတွက် ဒီတိုင်းရင်းသား လူမျိုးစုတွေရဲ့ သမိုင်းကြောင်း၊ စာပေနဲ့ ဘာသာစကားတွေကို လေ့လာသုတေသနပြု မှတ်တမ်းတင်ထားဖို့ လိုအပ်ကြောင်း တောင်ကြီးတက္ကသိုလ် မြန်မာစာဌာနမှ ယင်းနက်လူမျိုး အကြောင်း စာတမ်းပြုစုနေတဲ့ ဆရာမ တစ်ဦးက ပြောပါတယ်။ ယင်းနက်တိုင်းရင်းသားတွေဟာ နမ့်စန် တစ်နေရာတည်းမှာပဲ ကျန်ရှိတော့တာ ဖြစ်ပါတယ်။
လက်ရှိမြို့အခြေအနေ

မြို့က ကျဉ်းပြီးတော့ မင်းလမ်းတစ်ကြောင်းတည်း တည်ရှိပါတယ်။ နမ့်စန်မြို့နယ်မှာ ကျေးရွာပေါင်း ၁၀၀ ကျော် တည်ရှိပြီးတော့ ခရိုင်တွင်း ကျေးရွာအများဆုံးပါ။ နို့ခြောက်နဲ့ ထိုဟူးနွေးက အရင်ကနာမည်ရခဲ့တယ်။ အခုအချိန်မှာ နာနတ်သီးစိုက်ပျိုးရေး၊ မှိုကြော်ထုတ်လုပ်ရေးနဲ့ စိုက်ပျိုးရေး ထုတ်ကုန်တွေ ကျော်ကြားပါတယ်။ မြို့တွင်းကို နမ့်တိန်းချောင်း ဖြတ်သန်းစီးဆင်းနေတဲ့ မြို့ဖြစ်ပြီးတော့ နွေရာသီမှာ ရေရှားတတ်ပါတယ်။ မိုးနဲနဲ့ ခိုလမ်တို့ရဲ့ လမ်းခွဲဖြစ်ပြီးတော့ တိုင်းရင်းသားပေါင်းစုံ နေထိုင်ကြပါတယ်။ အနောက်တောင်ဘက် ၁၄ မိုင်အကွာမှာ စုပေါင်း ပလောင်ရွာတွေကိုလည်း မြင်တွေ့ရမှာ ဖြစ်ပါတယ်။ နာနတ်သီးပြီးတော့ ပြောင်းဖူး၊ ပဲစင်းငုံ၊ စပါး၊ နေကြာ၊ နှမ်း၊ ပဲအမျိုးမျိုးနဲ့ ဆီထွက်သီးနှံတွေ ဖြစ်ပါတယ်။ တောင်ယာနဲ့ ရွှေ့ပြောင်းတောင်ယာတွေကိုလည်း တိုင်းရင်းသားများ လုပ်ကိုင်ကြပါသေးတယ်။

စွန့်ဦးတီထွင် မွေးမြူရေးသမားဆိုလို့ ကြက်ဆင် အနည်းငယ် မွေးမြူတာကိုလည်း တွေ့ခဲ့ရတယ်။ နမ့်စန်မြို့မှာ လက်နက်ကိုင်တပ်ဖွဲ့အများစုရှိပြီး ဌာနချုပ်သုံးခုနဲ့ အဖွဲ့ပေါင်း ငါးဖွဲ့လောက် ကျင်လည်လှုပ်ရှားရာ ဘူမိနက်သန်နေရာလည်း ဖြစ်တယ်။ တွင်းထွက်အဖြစ် ကျောက်မီးသွေး တူးဖော်နေခြင်းကို လွန်ခဲ့တဲ့ငါးနှစ်လောက်က တူးဖော်နေကြပြီးတော့ အခြားသတ္တုထွက် ပစ္စည်းများလည်း ထွက်ရှိနိုင်ပါတယ်။
မူးယစ်ဆေးဝါးနဲ့ WY (ခေါ်) ရာမ စိတ်ကြွဆေးပြား အန္တရာယ်က နေရာအနှံ့ လူငယ်တွေကြားမှာ ပျံ့နှံ့တည်ရှိနေပြီး နောက်ကွယ်က စီးပွားရေးနဲ့ ဆက်စပ်နေတဲ့အတွက် ထိန်းချုပ်ဖို့ ခက်ခဲနိုင်တယ်လို့ ဒေသခံတွေက ဆိုပါတယ်။ စီးပွားရေးသမားတွေရဲ့ ပြောပြချက်အရ ၁၀ ယောက်မှာ ခြောက်ယောက်လောက်က ဒီမူးယစ်ဆေး ငွေကြေးလည်ပတ်မှုနဲ့ လုပ်ငန်းမကင်းကြဘူးလို့ ဆိုပါတယ်။

ထူးခြားချက်တစ်ခုကတော့ ရှမ်းပြည်တောင်ပိုင်းမှာ ဗဟိုချက်မလို့ ယူဆကြတဲ့ ကြေးတိုင်ကို နမ့်စန်မြို့မှာ တည်ရှိနေတာလည်း ဖြစ်ပါတယ်။ ရှေးယခင်က ရွှေဟင်္သာ ငှက်တွေ ရှိဖူးတယ်လို့လည်း ဆိုပါတယ်။ ကျောက်လက်နက်များ ထွက်ရှိရာ မိုင်းပန်နဲ့ နယ်နိမိတ်ချင်း ဆက်စပ်နေတဲ့အတွက် ရှေးဟောင်းသမိုင်းကြောင်းနဲ့ အများကြီး ဆက်စပ်နိုင်တယ်လို့ ဘူမိဗေဒသမားတွေက သုံးသပ်ကြပါတယ်။

တိန်းချောင်း သဘာဝရိပ်သာ ကလေးငယ် ပညာရေးကျောင်းနဲ့ ရတနာမာန်အောင် ဘက ဘုန်းတော်ကြီးသင် ပညာကျောင်း နှစ်ကျောင်း ရှိပါတယ်။ ရတနာမာန်အောင် ဘက ကျောင်းမှာ ကလေးငယ် ၃၄၀ ကျော်ရှိပြီးတော့ ကလေးအိပ်ဆောင် မလုံလောက်တဲ့အတွက် လိုအပ်ချက်တွေ ရှိနေတာလည်း ဖြစ်ပါတယ်။
ဖေးကူပါ

မြို့အပြင်ဘက်မှာ တောင်းရမ်းစားသောက်သူများနဲ့ အနာကြီးရောဂါသည်များ စုဝေးနေတတ်တဲ့ ရွာတစ်ရွာလည်းတည်ရှိပြီးတော့ နေ့ခင်းပိုင်းတွေဆိုရင် မြို့ထဲမှာ ရှာဖွေစားသောက်တတ်ကြတာကို မြင်တွေ့ရပါတယ်။ ကလေးငယ်တွေနဲ့ အမျိုးသမီးတွေ တောင်းရမ်းနေတာ မြင်ရတာ စိတ်မချမ်းမြေ့ ဖွယ် မြင်ကွင်းတစ်ခုလည်း ဖြစ်ပါတယ်။

ဒါ့အပြင် ခိုလမ်နဲ့လည်း နီးတဲ့အတွက် မြေယာပြဿနာရပ်များ အများဆုံးရှုပ်ထွေးနေပြီးတော့ မပြီးပြတ်သေးတဲ့ မြေယာမှုခင်းတွေ အများအပြားရှိနေတာလည်း ဖြစ်ပါတယ်။ နမ့်စန်မြို့အတွင်းက ကျေးရွာအတော်များများမှာ လိုအပ်နေတာကတော့ လမ်းပန်းဆက်သွယ်ရေးနဲ့ လျှပ်စစ်မီးလိုအပ်ချက်တွေ ပဲ ဖြစ်ပါတယ်။ တချို့ဒေသတွေမှာ မီးကြိုးတွေ ဖြတ်သန်းသွားပြီးတော့ မီးမရတဲ့ရွာတွေ အများကြီးရှိပါတယ်။ တေးရေးဆရာ စိုင်းခမ်းလိတ်ရေးပြီး စိုင်းထီးဆိုင်ဆိုတဲ့ ‘ရန်ကုန်မှာသာတဲ့ လ’ သီချင်းထဲကလို ပျံသာပျံတယ် မနားတယ်ဆိုတဲ့ စာသားအတိုင်းပါပဲ။ စာနာသင့်ပါတယ်။

နမ့်စန်မြို့ ဖွံ့ဖြိုးတိုးတက်သာယာဖို့အတွက် ရှမ်းပြည်နယ်အစိုးရ တာဝန်ရှိသူများရော၊ ဒေသခံပြည်သူများပါ ဝိုင်းဝန်းကြိုးပမ်း လုပ်ဆောင်ကြပြီး ဖွံ့ဖြိုးတိုးတက်တဲ့ ဒေသတစ်ခုဖြစ်လာဖို့ကို ဆုတောင်းရင်း…။

စည်သာ(တောင်ကြီး)

Leave a Reply