“ကျနော် အသက်၄၅နှစ်ကျော်ပြီ နှလုံးသားက ၂၀မကျော်သေးဘူး”ဆိုတဲ့ ဝေဠုကျော်

ပရဟိတလုပ်ငန်းတွေလုပ်ကိုင်နေတဲ့ ဝေဠုကျော်က ပရိသတ်များတိုက်တွန်းမှုကြောင့် လူပျိုကြီးဘဝကို အဆုံးသတ်ဖို့ အစီအစဉ်ရှိကြောင်းနဲ့ ဖူးစာရှင်ရှာတွေ့ထားပြီလို့ မီဒီယာများကိုဆိုပါတယ်။

“ပရိသတ်တွေကလည်း လူပျိုကြီးဘဝကို အဆုံးသတ်ဖို့ ပြောနေကြတယ်။ ကျနော် အဆုံးသတ်ဖို့ ရှာတွေ့ထားတယ်။ မသေချာသေးလို့ သေချာရင်ပြောပါမယ်။ အမြန်ဆုံးအဆုံးသတ်ချင်နေပါပြီ။ လူဆိုတာ အမှားနဲ့ မကင်းတဲ့အတွက် အဲ့ အမှားတွေ အမှားတွေ ရှိနေသေးလို့ လိုအပ်တာလေးတွေ ရှိနေတာဖြစ်ပါလိမ့်မယ်။ ကျနော်အသိပေးမှာပါ။ ဘယ်တော့ ဆိုတော့ပြောဖို့စောပါသေးတယ်” လို့ ဆိုပါတယ်။

ဝေဠုကျော်က လက်ရှိမှာပရဟိတလုပ်ငန်းများကိုသာ လုပ်ကိုင်နေပြီး အနုပညာအလုပ်ကို မလုပ်ဖြစ်သေးဘူးလို့ ဆိုပါတယ်။ ရုပ်ရှင်ဇာတ်ကားများ ပြန်လည်ရိုက်ကူးဖို့ အစီအစဉ်ရှိနေပြီး လက်ရှိမှာ ခန္ဓာကိုယ်အတွက် လေ့ကျင့်ခန်းများပြုလုပ်နေတယ်လို့ ဆိုပါတယ်။

“အနုပညာအလုပ်က ဘာမှမလုပ်ဖြစ်သေးဘူး။ ဒါပေမယ့် ကျနော်ကားပြန်ရိုက်ဖို့ လုပ်နေပါတယ်။ ကျနော်ပိန်သွားတဲ့ အတွက် Body Beauty ပြန်ကစားနေရတယ်။ အနုပညာအလုပ်တွေ ရပ်လိုက်တာမဟုတ်ပါဘူး။ ကျနော်ပြန်လုပ်မှာပါ။ ကျနော်ကိုကမ်းလှမ်းတာတော့ မရှိသေးဘူး။ မကမ်းလှမ်းလည်း ကိုယ့်ဟာကိုယ့်ထုတ်ရိုက်မယ်”

“ကျနော်နဲ့လိုက်တဲ့ ဇာတ်မျိုးကိုစဉ်းစားပြီးတော့ရိုက်မယ်။ စီအိုင်ဒီဘကောင်းလို ဇာတ်ကားကြီးလုပ်ဖို့ စဥိးစားနေတယ်။ ဘဦးဇာတ်ကားက အဆုံးမသတ်ရသေးဘူး။ ကျနော်ဘဝလည်း အဆုံးမသတ်ရသေးဘူး။ ဘကောင်းကို အဆုံးသတ်ဖြစ်မလား။ ဘဦးကို အဆုံးသတ်ဖြစ်မလား။ လူပျိုကြီးဘဝကို အဆုံးသတ်ဖြစ်မလား။ တခုခုတော့ အရင်လုပ်ရမှာပါ”လို့ ပြောပါတယ်။

ဒီဇင်ဘာ ၂ ရက်နေ့မှာ မွေးနေ့ပြုလုပ်ခဲ့ပြီး မွေးနေ့နဲ့ ပတ်သက်လို့လည်း အခုလိုဆိုပါတယ်။

“ကျနော့်မွေးနေ့မှာ ကျနော့်ညီမတွေက ဝိုင်းပြီးတော့ မွေးနေ့ကိတ်လေး လုပ်ပေးကြတယ်။ ကျနော်မွေးနေ့မလုပ်ဘူး။ ကျနော် Brand တွေလည်း မရှိဘူး။ ကျနော်ပြည်သူတွေအတွက် ဘာလေးလုပ်ပေးခဲ့လဲပဲ စိတ်ဝင်စားတယ်။ ကျနော်မှာ တန်ဖိုးကြီးဆိုလို့ ချစ်တတ်တာလေးပဲရှိပါတယ်။ ကျနော် အသက်၄၅နှစ်ကျော်ပြီ နှလုံးသားက ၂၀မကျော်သေးဘူး”လို့ ပြောပါတယ်။

ဝေဠုကျော်ဟာ ပရိသတ်တွေ လေးစားအားကျရတဲ့ သရုပ်ဆောင် တဦးလည်း ဖြစ်ပါတယ်။ ဝေဠုကျော်ဟာ ၂၀၀၉ခုနှစ်ကစပြီး လူမှု အကျိုးပြုအလုပ်တွေကို လုပ်ကိုင်ဖို့ ဝေဠုကျော် ဖောင်ဒေးရှင်းကို စပြီး တည်ထောင်ဖြစ်တာဖြစ်ပါတယ်။

#ဧရာဝတီ

Leave a Reply