မီးအိမ်ရှင်ဆရာဆု ရသွားသူ မသန်ပေမယ့်စွမ်းတဲ့ ဆရာမလေး

မူလတန်းပြရာထူးအတွက် လူတွေ့အစစ်အဆေးခံရန် အင်တာဗျူးခန်းထဲသို့ မအိအိညိမ်းဝင်လာခဲ့သည်။ ရေနံဝနေသည့် ညောင်ဦးမြို့ ကျွန်းပျဉ်ထောင်ပျဉ်ကာ နှစ်ထပ်ကျောင်းဆောင်ကြီး၏ အခန်းအတွင်း ရောက်သည်နှင့် ထိုင်ခုံတွင်ထိုင်နေကြသော လူတွေ့စစ်မည့်အရာရှိသုံးဦးက သူ၏ညာဘက်ခြေထောက် ခြေဖျားထောက်သွားသည်ကို အထူးအဆန်းသဖွယ် အကဲခတ်နေကြသည်။

အခန်းအတွင်းရောက်သောအခါ သဘောကောင်းပုံရသော အသက် ၄၀ ခန့်အရွယ် အရာရှိတစ်ဦးက သူ့ကို ဘွဲ့လက်မှတ်ထုတ်ပြခိုင်းသည်။ ထိုအချိန်မှာပင် ညာဘက်လက် အရိုးပျော့သည့် ပုံစံဖြစ်နေပုံကိုပါ အရာရှိများက ထပ်အကဲခတ်မိသွားသည်။

“သမီးက လက်ရောမသန်ဘူးလား”ဟူသော အမေးကို ညာဘက်ခြေထောက်သာမက ညာဘက်လက်ပါမသန်သည့်အကြောင်း မအိအိညိမ်းက ပြန်ရှင်းပြလိုက်သည်။

ထိုအဖြစ်အပျက်သည် လွန်ခဲ့သော ၅ နှစ်ခန့်က ဆရာမဖြစ်ခွင့်လျှောက်ထားရာတွင် သူ ပထမဆုံးတွေ့ကြုံခဲ့ရသည့် အဖြစ်အပျက်တစ်ခုဖြစ်သည်။ ထိုဖြစ်ရပ်များအပြီး နောက်ထပ်နှစ်ကြိမ် ဆရာမရာထူးအတွက် ထပ်မံလျှောက်ထားခဲ့သည်။ သို့သော် ယခုကဲ့သို့ပင် အငြင်းခံခဲရကြောင်း မအိအိညိမ်းက ပြောပြသည်။

မြန်မာ့ပညာရေးစနစ်တွင် ပညာရေးတက္ကသိုလ်၊ ပညာရေးကောလိပ်ဝင်ခွင့်နှင့် အခြားသော ဆရာဖြစ်သင်တန်းများ၌ သင်တန်းသား ဆရာ၊ ဆရာမလောင်းများ ကိုယ်လက်အင်္ဂါပြည့်စုံ၊ မပြည့်စုံ အစစ်ခံကြသည်။ ဆရာမဖြစ်ခွင့်အတွက် ထိုသို့ကိုယ်လက်အင်္ဂါပြည့်စုံမှု ရှိ၊ မရှိစစ်ဆေးသည်ကို ထိုအချိန်က သူ့အနေနှင့် တိတိကျကျမသိခဲ့။ ကြားဖူးနားဝတော့ရှိသည်။ နိုင်ငံ့ဝန်ထမ်း ဆရာမတစ်ဦးဖြစ်ရေးကိုသာ ဖမ်းဆုပ်နိုင်ရန် လျှောက်ထားခဲ့ခြင်းဖြစ်သည်။

သန်းခေါင်စာရင်း (၂၀၁၄) အရ မြန်မာနိုင်ငံတွင် စုစုပေါင်းလူဦးရေ၏ ၄ ဒသမ ၆ ရာခိုင်နှုန်းသည် မသန်စွမ်းသူများဖြစ်သည်။ တစ်နည်းအားဖြင့် ၂ ဒသမ ၃ သန်းသည် မသန်စွမ်းသူများဖြစ်သည်။ သို့သော် မြေပြင်အခြေအနေတွင် ထိုပမာဏထက် ပိုများနိုင်ကြောင်း ကမ္ဘာ့ကျန်းမာရေးအဖွဲ့က ခန့်မှန်းထားသည်။ မသန်စွမ်းသူများ ပညာသင်ယူခွင့် အခြေခံကျောင်းများ၌ဖြစ်စေ၊ တက္ကသိုလ်များတွင်ဖြစ်စေ လက်ခံသင်ကြားရန် ပညာရေးဝန်ကြီးက ပြောဆိုထားသော်လည်း ကျောင်းအုပ်များ၏ဆန္ဒအရ လက်ခံ၊ ငြင်းပယ်မှုများ ရှိနေဆဲဖြစ်သည်။

အခြေခံအဆင့်တွင် ကျောင်းနေခွင့် လုံးဝငြင်းပယ်ခံရခြင်းနှင့် ကျောင်းနေခွင့်ရသော်လည်း မသန်စွမ်းများအတွက် လိုအပ်သည့်အဆောက်အအုံမရှိသေးခြင်နှင့် ဆရာအင်အားမလုံလောက်ဟုဆိုကာ ငြင်းပယ်ခြင်းရှိနေသေးသည်။ “နယ်က ကလေးတွေက ကျောင်းကိုပဲ အားကိုးရတာလေ။ ကျောင်းက ဆရာ၊ ဆရာမတွေသာ သူတို့ရဲ့ အားကိုးရာပေါ့။ အဲဒီခံယူချက်နဲ့ ရှေ့ဆက်လိုက်တာပါ။ အခုရွာကျောင်းမှာ လုပ်အားပေးတာ ဆယ်စုနှစ်ကျော် (၂၀၀၄ ခုနှစ်မှစ၍ ယခုအချိန်အထိ လုပ်အားပေးနေဆဲဖြစ်သည်) ပြီပေါ့”ဟု မအိအိညိမ်းက ပြောသည်။

သူ့မိသားစုတွင် မွေးချင်း ၈ ဦးအနက် သူက ၄ ဦးမြောက်ဖြစ်သည်။ ဖခင်ဖြစ်သူကတော့ ဆုံးသွားပြီဖြစ်သည်။ အစ်ကိုဖြစ်သူက မိသားစုကိုဦးစီးပြီး ပဲနီ၊ ပဲဇီးကွက်၊ မြေပဲ စသည်ဖြင့်စိုက်ပျိုးကာ တောင်သူလုပ်ကိုင်စားသောက်ကြသည်။ သူ့ရွာလေးတွင်တော့ သူတစ်ယောက်သာ မသန်စွမ်းသူဖြစ်သည်။ သို့သော် အများက လေးစားသမှုရှိသည့် “စေတနာ့ဝန်ထမ်း ဆရာမလေး ဒေါ်အိအိညိမ်း၊ ဓမ္မစကူးလ်ဆရာမ ဒေါ်အိအိညိမ်း၊ စာကြည့်တိုက်မှူး ဒေါ်အိအိညိမ်း”ဟု ရွာက ခေါ်ကြသည်။

မကွေးတိုင်း ပခုက္ကူမြို့နယ်အပိုင်ဖြစ်သော်လည်း ရွာသူရွာသားအများစုက ခရီးနီးစပ်ပြီး ရေလမ်းဖြင့် သွားလာရေးလွယ်သည့် ပုဂံနှင့်သာ ကူးလူးဆက်ဆံမှု ပိုများသည်။ ဈေးရောင်းဈေးဝယ်၊ အလုပ်သွား စသည်ဖြင့် နေ့စဉ်နေ့တိုင်း ပုဂံဘက်သို့ သွားလာဆက်သွယ်ကြသည်။ ဆရာမလေး ဒေါ်အိအိညိမ်း တစ်ဦးတည်းသာ မဟုတ်။ မြန်မာနိုင်ငံတွင် မသန်စွမ်းသူများသည် လုပ်ငန်းခွင်ဝင်ရောက်လုပ်ကိုင်ခွင့်၊ ပညာသင်ခွင့်အပါအဝင် အခြေအနေအချို့က အကန့်အသတ်ရှိဆဲဖြစ်သည်။

အခြေခံအဆင့်တွင် လုံးဝကျောင်းနေခွင့်ငြင်း ပယ်ခံရခြင်းနှင့် ကျောင်းနေခွင့်ရသော်လည်း မသန်စွမ်းများအတွက် လိုအပ်သည့်အဆောက်အအုံမရှိသေးခြင်းနှင့် ဆရာအင်အားမလုံလောက်ဟုဆိုကာ ငြင်းပယ်ခြင်းရှိနေသေးသည်။ထို့ပြင် သင်ရိုးသစ်တွင် ခုန်ပေါက်ကစားရသည့် အားကစားများလည်း ပါဝင်သောကြောင့် မသန်စွမ်းကလေးများ ကျောင်းတက်ရန် အဆင်မပြေသောကြောင့် အထူးကျောင်းကိုသာ သွားတက်ရန် ပြောဆိုခံရပြီး ငြင်းပယ်ခံရခြင်းဖြစ်သည်။

ဆရာဖြစ်သင်တန်းဝင်ခွင့်တွင်လည်း လက်နှစ်ချောင်းပူးနေသဖြင့်၊ ဓားပြတ်၍ လက်ချောင်းတိုနေသဖြင့်၊ လက်ပွားပါနေသဖြင့်၊ မျက်စိတွင် ကျောက်မျက်လုံးထည့်ထားသဖြင့် စသည်ဖြင့် ငြင်းပယ်ခံရမှုများ ရှိခဲ့သည်။ မသန်စွမ်းသူများပညာရေးကော်မတီ အထွေထွေအတွင်းရေးမှူး ကိုရဲဝင်းက “အမြင်မတော်ဘူးဆိုပြီး မသန်စွမ်းမှုကို ရှုတ်ချအထင်သေးနေတာတွေက လူ့အခွင့်အရေးကို ချိုးဖောက်နေသလို တိုင်းပြည်ရဲ့ လူ့စွမ်းအားအရင်းအမြစ်တွေကို ဆုံးရှုံးစေတယ်။ ဆရာလောင်းတွေ ဆုံးရှုံးရပါတယ်” ဟု မှတ်ချက်ပေးသည်။

မသန်စွမ်းသူများ၏ အခွင့်အရေးဥပဒေတွင် မသန်စွမ်းမှုကိုအကြောင်းပြု၍ ခွဲခြားဆက်ဆံမှုနှင့် နှိမ့်ချမှုတို့မရှိစေရဘဲ စီးပွားရေး၊ လူမှုရေး၊ ပညာရေးနှင့် ကျန်းမာရေးဝန်ဆောင်မှု အပြည့်အဝရရှိစေရန် စီမံဆောင်ရွက်ပေးရမည့်အကြောင်း ပြဋ္ဌာန်းထားသည်။ အမျိုးသားပညာရေးဥပဒေကို ပြင်ဆင်သည့် ဥပဒေတွင် မသန်စွမ်းသူများအတွက် ပညာသင်ယူသည့် အဆင့်တိုင်းတွင် တန်းတူသင်ကြားရေး၊ အတားအဆီးမရှိသော ကျောင်းပတ်ဝန်းကျင် ဖန်တီးနိုင်ရေး ဆောင်ရွက်ရန် ပြဋ္ဌာန်းထားသည်။

မသန်စွမ်းသူများ ပညာသင်ကြားခွင့်ဥပဒေများသည် စာရွက်ထဲမှာပင်ရှိသေးပြီး ဥပဒေစိုးမိုးမှု အားနည်းနေသေးသလို လက်တွေ့အကောင်အထည်ဖော်မှု အားနည်းနေသေးကြောင်း မသန်စွမ်းအခွင့်အရေးလှုပ်ရှားသူများက ဝေဖန်ကြသည်။ ပညာရေးနယ်ပယ်တွင်သာမက အခြားသော လုပ်ငန်းခွင်နယ်ပယ်တွင်လည်း မသန်စွမ်းသူများ ငြင်းပယ်ခံရဆဲဖြစ်သည်။ အလုပ်ခေါ်စာမှာပင် “ကျန်းမာ သန်စွမ်းရမည်” ဟူသော မှတ်ချက်မျိုး ထည့်သွင်းရေးသားနေသည်များ ရှိနေဆဲဖြစ်သည်။

၂၀၁၆ ခုနှစ်အထိ တက္ကသိုလ်ဝင်ခွင့်လမ်းညွှန်၌ပင် စစ်ကိုင်းပညာရေးတက္ကသိုလ်နှင့် ရန်ကုန်ပညာရေးတက္ကသိုလ် လျှောက်ထားခွင့်တွင် ကျန်းမာရေးပြည့်စုံပြီး ကိုယ်လက်အင်္ဂါမသန်စွမ်းခြင်း၊ ချို့တဲ့ခြင်း၊ စကားမပီသခြင်း၊ စကားထစ်ခြင်းများ ကင်းရှင်း၍ ဆရာအင်္ဂါရပ်နှင့်ပြည့်စုံသူဖြစ်ရမည်ဟု ကန့်သတ်ထားခဲ့သည်။ မသန်စွမ်းသူများ ပညာသင်ခွင့်အတွက် ပြီးခဲ့သည့်နှစ် တက္ကသိုလ်ဝင်ခွင့်မှစကာ “ကိုယ်လက်အင်္ဂါ ပြည့်စုံပြီး ကျန်းမာသန်စွမ်းရမည်” ဆိုသော ကန့်သတ်ချက်အစား “ကျန်းမာရေးကောင်းမွန်ရမည်” ဟုသာ ပြောင်းလဲခဲ့သည်။

သို့သော် လက်တွေ့မြေပြင်အခြေအနေတွင် ကျောင်းအုပ်ကြီးများနှင့် လူတွေ့စစ်ဆေးသူများ၏ သဘောဆန္ဒအရ “မသန်စွမ်း” ဟု မှတ်ချက်ပြုကာ ငြင်းပယ်မှုများလည်း ရှိနေဆဲဖြစ်သည်။ ထိုအထဲတွင် စေတနာ့ဝန်ထမ်း ဆရာမလေး ဒေါ်အိအိညိမ်းလည်း ပါဝင်ခဲ့ရသည်။ ဆရာမ ဖြစ်ခွင့်ငြင်းခံရသည့် ထိုအချိန်က သူဝမ်းနည်းခဲ့သည်။ ငိုခဲ့သည်။ သို့သော် မသန်စွမ်းမှုကြောင့် ကိုယ့်ကိုယ်ကိုယ် အသုံးမကျဟုယူဆပြီး အယုံအကြည်မဲ့မသွားခဲ့။ ဝါသနာပါသည့်၊ ဆန္ဒပြင်းပြသည့် နိုင်ငံ့ဝန်ထမ်း ဆရာမဖြစ်ရန် သုံးကြိမ်တိုင်တိုင် လျှောက်ထားခဲ့သည်။

နောက်ပိုင်းတွင်တော့ အသက်ကန့်သတ်ချက်ကြောင့် သူလျှောက်ခွင့်မရတော့။ သူဖြစ်ချင်သည့် နိုင်ငံ့ဝန်ထမ်း ဆရာမတစ်ဦးဖြစ်ဖို့ ယခုဘဝတွင်တော့ မျှော်လင့်ချက်ကုန်ဆုံးသွားပြီဟု ကောက်ချက်ချနေတော့သည်။ ဆရာဟူသည် စံပြပုဂ္ဂိုလ်ဆိုကာ မသန်စွမ်းသူများကို ဆရာဖြစ်ခွင့်မပေးသင့်ဟု ယူဆချက်အပေါ် စိတ်ဓာတ်၊ ခံယူချက်နှင့် သင်ကြားသည့်ဘာသာရပ်အပေါ် ကျွမ်းကျင်မှုသာအရေးကြီးကြောင်း သူက မှတ်ယူထားသည်။ ကိုယ်လက်အင်္ဂါပြည့်စုံပြီး ရုပ်ရည်ချောမောသည့်ဆရာများကို တပည့်များက လွမ်းဆွတ်တမ်းတသည်မရှိ။ စာရိတ္တကောင်းပြီး စေတနာပြည့်ပြည့်ဝဝဖြင့် သင်ကြားပြသမှုကောင်းသော ဆရာကိုသာ လွမ်းဆွတ်တမ်းတမှုရှိသည်ဟု ယုံကြည်ထားသူဖြစ်သည်။

မအိအိညိမ်း

ဆရာမလေး ဒေါ်အိအိညိမ်း၏ မသန်စွမ်းမှုက မွေးရာပါဖြစ်သည်။ အသက် ၁၂ နှစ်ဝန်းကျင်က ဆေးကုသဖူးသော်လည်း ပျောက်ကင်းနိုင်မည်မဟုတ်ကြောင်း ဆရာဝန်က အသိပေးလိုက်ပြီးနောက် ဆက်ပြီး မကုတော့။ သူ့ဘဝတွင် အလယ်တန်း၊ အထက်တန်း ကျောင်းတက်ချိန်များက အခက်အခဲများနှင့် အဓိကကြုံခဲ့ရကြောင်း သူငယ်ဘဝကို ပေါ့ပေါ့ပါးပါးပြုံးပြုံးရွှင်ရွှင်ပင် ပြန်ပြောပြသည်။ သို့သော် ကျောင်းတက်ရသည်၊ စာသင်ရသည်ကိုပင် ပျော်ရွှင်ခဲ့သောကြောင့် ထိုအခက်အခဲများကို ကျော်လွှားခဲ့သည်။ အထကပုဂံမှ အထက်တန်းအောင်ပြီး ပခုက္ကူတက္ကသိုလ်ကို မြန်မာစာအဓိကဖြင့် ဆက်တက်သည်။ ဘွဲ့ရသည်။

ယခုတော့ သူ့ရွာ အရှေ့သီရိအထက်တန်းကျောင်းခွဲတွင် စေတနာ့ဝန်ထမ်းအဖြစ် လုပ်အားပေးနေပြီဖြစ်သည်။ ယဉ်ကျေးမှုဒေသပုဂံ လောကနန္ဒာရေဆိပ်ရောက်လျှင် အရှေ့သီရိရွာမှ “ဆရာမ အိအိညိမ်း” ဆိုလိုက်လျှင် မသိသူနည်းလိမ့်မည်။ ဧရာဝတီမြစ်ကို စက်လှေဖြင့် ၁၅ မိနစ်ခန့် ဖြတ်ကူးပြီး ၅ မိနစ်၊ ၁၀ မိနစ်ခန့် ဆိုင်ကယ်စီး၊ လမ်းလျှောက်လျှင် သူ့ရွာလေးကို ရောက်နိုင်မည်။

ယခင်က ထိုရွာကျောင်းလေးမှာလည်း မူလတန်းအဆင့်သာဖွင့်နိုင်သောကြောင့် အလယ်တန်း၊ အထက် တန်းရောက်လျှင် ပုဂံဘက်သို့ ဧရာဝတီမြစ်ကို ဖြတ်ကူးကာ ကျောင်းတက်ကြရသည်။ ယခုအခါ ရွာကျောင်းလေးမှာ အထက်တန်းကျောင်းခွဲအဖြစ် နဝမတန်းအထိဖွင့်နိုင်ပြီဖြစ်သောကြောင့် ကျောင်းသားအများစုလည်း မြစ်ကူးချောင်းခြား ကျောင်းတက်စရာမလိုတော့။ ဆယ်တန်းရောက်မှသာ ပုဂံဘက်ကိုသွားပြီး ကျောင်းတက်ကြရတော့သည်။

ဆရာမဒေါ်အိအိညိမ်း၏ အိမ်နှင့် ကျောင်းဆိုလျှင် ၁၅ မိနစ်ခန့်လမ်းလျှောက်ရသည်။ ကျွန်းရွာဖြစ်၍ ပုံမှန်ရေကျချိန်တွင် ဒေါ်အိအိညိမ်းကျောင်းကို လမ်းလျှောက်သွားသည်။ ရေကြီးချိန် (ဇူလိုင်၊ ဩဂုတ်လပိုင်း) တွင်တော့ မိသားစုဝင်တစ်ဦးဦးက လှေဖြင့် ကျောင်းလိုက်ပို့ကြရသည်။ နေ့စဉ် မနက်တိုင်း ၈ နာရီဝန်းကျင်ဆိုလျှင် ဆရာမဒေါ်အိအိညိမ်း ကျောင်းသွားပြီ။ ညနေ ၃ နာရီကျော်ဆိုလျှင် ကျောင်းဆင်းပြီ။ ကလေးများနှင့်အတူ တအိအိလမ်းလျှောက်ရင်း ဒေါ်အိအိညိမ်း ပြန်လာပြီ။

ရွာကျောင်းလေးတွင် ကျောင်းသားများကို မြန်မာစာ၊ အင်္ဂလိပ်စာ၊ အခြေခံသိပ္ပံသင်ပေးသည်။ သူဘွဲ့ရသည်က မြန်မာစာအဓိက။ အင်္ဂလိပ်စာကို စိတ်ဝင်စားပြီး စိတ်နှစ်သင်သည်။ သို့သော် အခြေခံသိပ္ပံမှာတော့ ပုံဆွဲညံ့ကြောင်း သူက ဝန်ခံသည်။ ရွာသူ၊ ရွာသားများနှင့် ကျောင်းတာဝန်ရှိသူများက ဆရာမလေးဒေါ်အိအိညိမ်းကို တစ်လ ကျပ် ၈၀,၀၀၀ ပြန်ကူညီပေးသည်။ ထိုပမာဏကိုလည်း သူ့အနေနှင့်များသည်ဟု လည်းမမှတ်။ နည်းသည်ဟူလည်း မယူ။ စာသင်နေရခြင်းကိုသာ ကျေနပ်နေသူ။

“စာသင်ရတာ ပျော်တယ်ရှင့်။ စာမသင်ဘဲ နေရမှာပဲ ကြောက်နေတာ။ ကလေးတွေနဲ့နေရတာ ကျွန်မကိုကျွန်မလည်း အားတက်တယ်။ ဒီလိုမဟုတ်ရင် ကျွန်မကိုယ်ကျွန်မ မကျေမနပ်ဖြစ်နေမိမှာ” ဟု ဆရာမလေး ဒေါ်အိအိညိမ်းက ဆိုသည်။

“မသန်စွမ်းမှုကို မကျေမနပ်ဖြစ်ပြီး ကိုယ့်ကိုယ်ကိုယ် လူပိုကြီးတစ်ယောက်လိုမျိုး ခံစားရမှာဆိုတော့ အခု ကလေးတွေနဲ့ ပျော်လိုက်၊ ပါးလိုက်၊ ကိုယ်သိသလောက် သူတို့ကိုဖြန့်ဝေပေးလိုက်ဆိုတော့ ပျော်နေတာ” ဟု သူက ဆက်ပြောသည်။

ထို့အတွက် ဆရာမလေး ဒေါ်အိအိညိမ်း မသန်စွမ်းဖြစ်သော်လည်း ကျောင်းသားများက လှောင်ပြောင်မှု မရှိကြ။ ကျောင်းသားများက သူ့ကိုနားလည်ပေးကြသည်။ ဆရာနှင့်ကျောင်းသား လိုက်လျောညီထွေရှိကြသည်။ ကျောင်းရှိ ဆရာများကလည်း သူ့အပေါ် နားလည်မှုရှိကြသည်။

“ကျွန်မ စာသင်လာတဲ့အခါ သူငယ်တန်းကလေးတွေက ကျွန်မကို စိတ်ဝင်စားတယ်လေ။ ဆရာမ ဘယ်လိုလမ်းလျှောက်တာလဲ၊ ဘယ်လိုဖြစ်တာလဲဆိုတာ စိတ်ဝင်တစားမေးကြတယ်။ ကျွန်မလည်း သူတို့ကို ဆရာမက အမေမွေးကတည်းက ဒီလိုပဲဆိုတာ ပြန်ရှင်းပြရတယ်။ တချို့ကလေးတွေကျတော့လည်း ကျွန်မ ခြေဖျားထောက်သွားတဲ့အခါ စူးဆူးတယ်ထင်တာပေါ့။ ဆရာမ စူးထွင်ပါလား။ ဘာလို့မထွင်တာလဲဆိုပြီး ပြောကြတယ်။ ကျောင်းသားတစ်ယောက်ဆိုရင် ကျွန်တော့်အမေက စူးထွင်ကောင်းတယ် ဆရာမ။ ကျွန်တော် ခေါ်ခဲ့မယ်ပေါ့။ ကျောင်းသားတွေက ကျွန်မကို ဒေါက်ဖိနပ်တွေ စီးစေချင်တယ်။ ဆရာမ ဘယ်လို ဖိနပ်စီးတာလဲ၊ ဒေါက်ဖိနပ် စီးပါလားပေါ့။ ဆရာမက စီးမရဘူးဆိုတာလည်း သူတို့ကို ရှင်းပြရသေးတယ်” ဟု ရယ်မောလျက် သူက ပြောသည်။

မသန်စွမ်းသူမို့ ကျောင်းသားများက လှောင်ပြောင်မှုမရှိသည့်အပြင် လေးစားမှုရှိကြသလို ဆရာမ ဒေါ်အိအိညိမ်းကလည်း ကျောင်းသားများအတွက် အမြဲတမ်းစဉ်းစားပေးသည်။ ရွာထဲတွင် ကြိုးစားလိုစိတ်ရှိသော်လည်း ငွေကြေးအခက်အခဲရှိသောကြောင့် အထက်တန်းဆက်မတက်နိုင်တော့မည့် ကျောင်းသားတစ်ဦးကိုပင် မသန်စွမ်း ဆရာမလေး ဒေါ်အိအိညိမ်းက အလှူရှင်ရှာကာ ပုဂံတွင် ကျောင်းထားပေးထားသည်။

နွေရာသီတွင် ကျောင်းသားများ အင်္ဂလိပ်စာနှင့် အဆက်ပြတ်မသွားစေရန်လည်း ပြင်ပမှ ဆရာများကို ဖိတ်ခေါ်ကာ အင်္ဂလိပ်စာ ပညာဒါနသင်တန်းမျိုးကိုလည်း ဖွင့်စေသည်။ သူကိုယ်တိုင်လည်း ထိုသင်တန်းကိုတက်သည်။ ရွာကျောင်းက ကလေးများကို စေတနာအရင်းခံကာ သင်ကြားပေးသော်လည်း နိုင်ငံ့ဝန်ထမ်း ဆရာများလို သင်ကြားနည်း၊ ပညာရေးသဘောတရား၊ ပညာရေးစိတ်ပညာရပ်များကို အထူးတလည်တော့ မသင်ယူဖူး။ မလေ့လာဖူး။

သို့သော် သင်ကြား၊ သင်ယူရေးတွင် အရေးကြီးဆုံးဖြစ်သည့် ကလေးများအပေါ် နားလည်မှုရှိပြီး စိတ်ရှည်သည်းခံမှုနှင့် စေတနာကသာအရေးကြီးကြောင်း သူက မှတ်ယူထားသည်။ ရွာကျောင်းရှိ ပညာတန်ဆောင်၊ ပညာခေတ် မဂ္ဂဇင်းများကိုဖတ်ရှုကာ သင်ကြားနည်း၊ ပညာရေး သဘောတရား၊ ပညာရေးစိတ်ပညာကို ကျောင်းပြင်ပသင်ရိုးအဖြစ် အဆင်ပြေသလိုသာ လေ့လာနေသည်။

မသန်စွမ်းမှုကြောင့် ဆရာဖြစ်ခွင့်မရခဲ့။ အတိတ်ကံကြောင့် မသန်စွမ်းအဖြစ် မွေးဖွားကြီးပြင်းလာရသည်။ အတိတ်ကံကို ပြင်လို့မရ။ သို့သော် အနာဂတ်အတွက် ပြင်ဆင်ခွင့်ရှိသည်ဟု ဆရာမလေး ဒေါ်အိအိညိမ်းက ယုံကြည်ထားသည်။ ထို့အတွက် ရွာလေးက သူ့တပည့်ကျောင်းသားများ အင်္ဂလိပ်ဘာသာစကား ကောင်းကောင်းမွန်မွန်တတ်ဖို့ သူအားစိုက်သည်။ စာအုပ်တွေဖတ်သည်။ နွေရာသီတွင် အခမဲ့သင်တန်း စီစဉ်ပေးသည်။ သူကိုယ်တိုင်လည်းတက်သည်။

တစ်ဖက်ကလည်း သူစိတ်ပါဝင်စားသည့် အင်္ဂလိပ်ဘာသာစကားကို ကလေးများအတွက် ကောင်းကောင်းသင်ပေးနိုင်ရန် နွေရာသီကျောင်းပိတ်ချိန်တွင် ရန်ကုန်သို့လာပြီး အင်္ဂလိပ်ကျောင်းများတွင် တက်လိုသည်။ ထိုအကြောင်း သူ့ညီမများကိုပြောပြသောအခါ သွားလာရေးမလွယ်ကူသောကြောင့် မဖြစ်နိုင်ကြောင်း ငြင်းပယ်ခံရသည်။ သူတို့အကြောင်းပြချက်က ရန်ကုန်တွင် မသန်စွမ်းသူများ ဘတ်စ်ကားစီးရန် မလွယ်ကူသည့်အချက်ဖြစ်သည်။

ရန်ကုန်သို့လာ၍ အင်္ဂလိပ်ဘာသာစကားသင်တန်း ထပ်မတက်နိုင်တော့။ သို့သော် သူ အားမလျှော့သေး။ ထပ်မံဆည်းပူးသွားရန် သူနှင့်အနီးစပ်ဆုံးဖြစ်သည့် ပုဂံဘက်မှ ကျွမ်းကျင်သူဆရာများကိုချိတ်ဆက်ရန် ရှာဖွေနေလေသည်။ရွာကျောင်းလေးတွင် လုပ်အားပေး စေတနာ့ဝန်ထမ်းအဖြစ် အသက်ရှူရပ်တန့်သွားသည်အထိ လုပ်ကိုင်လိုသည်။ သို့သော် ကျောင်းက သူ့ကိုမလိုအပ်တော့ဟုဆိုလိုက်လျှင် ကလေးများကို စာသင်ရတော့မည်မဟုတ်။ ရွာက သူ့ကိုမလိုအပ်တော့ဟုဆိုလိုက်လျှင် သူဆန္ဒများ ရပ်ဆိုင်းသွားတော့မည်။

ထိုအချိန်ရောက်လာလျှင် စေတနာ့ဝန်ထမ်း မသန်စွမ်းဆရာမလေး ဒေါ်အိအိညိမ်း ဘာဆက်လုပ်မည်နည်း။ သူက ယခုကဲ့သို့ ဆိုလိုက်ပါသည်။

“ကျွန်မ ရည်ရွယ်ထားပါတယ်။ အဓိက ကျွန်မရင်ထဲမှာ ကလေးတွေပဲရှိတယ်။ ကလေးတွေကို ကျွန်မတို့ထက် တော်စေချင်တယ်။ ရွာက ကလေးတွေကို အင်္ဂလိပ်စာသင်ပေးမယ်။ နိုင်ငံ့ဝန်ထမ်းဖြစ်ဖို့တော့ မမျှော်တော့ပါဘူး”

ဒီကနေ့ အောက်တိုဘာ ၅ ရက်နေ့မှာ ကျရောက်တဲ့ ကမ္ဘာ့ဆရာများနေ့ အထိမ်းအမှတ် အဖြစ် ဆရာမလေးဒေါ်အိအိညိမ်းကို မြန်မာနိုင်ငံလုံးဆိုင်ရာ ဆရာ၊ဆရာမများအဖွဲ့ချုပ်ကနေပြီး အခုနှစ်အတွက် မီးအိမ်ရှင်ဆရာဆု ဂုဏ်ပြုချီးမြှင့်လိုက်ပါတယ်။ စေတနာ့ဝန်ထမ်း ဆရာမလေး ဒေါ်အိအိညိမ်းဟာ မွေးကတည်းက ညာဘက်ခြေ ထောက်နဲ့လက် မသန်စွမ်းသူဖြစ်ပေမယ့် ကလေးတွေရဲ့ပညာရေးအတွက် စွမ်းဆောင်နိုင်ခဲ့တဲ့ အတွက် အခုလိုဂုဏ်ပြုရတာလို့ မြန်မာနိုင်ငံလုံး​ဆိုင်ရာ ဆရာ၊ဆရာမများ အဖွဲ့ချုပ် အတွင်းရေးမှူး အဖွဲ့ဝင် ဒေါက်တာ ဇော်မျိုးလှိုင်က ပြောပါတယ်။

“သူ့ကိုဂုဏ်ပြုရတဲ့အကြောင်းရင်းကတော့ သူက ပညာပေးဝေတဲ့ ဆရာအလုပ်ကို သူအရမ်းစိတ်ဝင်စားပြီးလုပ်ချင်တယ်။ ဒါပေမယ့် ဘ၀ကံအကြောင်းကြောင့်သူဟာ ခြေထောက်မသန်တဲ့ အနေအထားလေးရှိတယ်။ အဲတော့ သူဟာအလုပ်လျှောက်ခဲ့တယ်။ ၃ နှစ်တိုင်တိုင် သူအလုပ်သွားလျှောက်ပေမယ့် ကျနော်တို့လက်ရှိ ပညာရေးအဖွဲ့အစည်းတွေက ဆရာ ဆရာမတယောက်ဖြစ်ခဲ့မယ်ဆိုရင် ကိုယ်လက်အင်္ဂါသန်စွမ်းရမယ်ဆိုတဲ့ အယူအဆနဲ့ လက်ရှိ အထိလုပ်ဆောင်နေတယ်။ ကျနော်တို့ ဒီဘက်ခေတ်ဝန်ကြီးက ဒီလိုမျိုးမလုပ်ကြပါနဲ့ မသန်ပေမယ့် စွမ်းတဲ့လူတွေကို အလုပ်ခန့်မှု ပြောတာတွေကြားရပေမယ့် လက်တွေ့မှာတော့ အဲလိုဟာတွေကို အကောင်အထည်မဖော်ကြဘူးခင်ဗျာ။ အဲတော့ ဒီဆရာမဟာ အလုပ်လျောက်ခဲ့ပေမယ့် အလုပ်မရခဲ့ဘူး။

အလုပ်မရတော့ သက်ဆိုင်ရာ သူ့ရွာကျောင်းမှာတော့ လုပ်အားပေးအဖြစ်နဲ့ ဆယ်စုနှစ်တခုလောက်သူမသန်ပေမယ့် သူစွမ်းစွမ်းတမံလုပ်ခဲ့တယ်ပေါ့နော်။ အဲဒီဟာတွေကို ကျနော်တို့တွေ့ရတဲ့အခါကျတော့ သူဟာ ဂုဏ်ပြု ထိုက်တဲ့ ဆရာတယောက်အဖြစ်နဲ့ ကျနော်တို့အဖွဲ့ကနေပြီးတော့ရွေးချယ်တာပေါ့နော်။ အဓိကကတော့ မသန်စွမ်းတွေကို ဆရာအဖြစ်နဲ့ ထမ်းဆောင်နိုင်စွမ်းရှိရက်သားနဲ့ ကျောင်းသားတွေ ရှေ့မှာ ဒီလိုမျိုး ကိုယ်လက်မသန်စွမ်းတာတွေမရှိရဘူးဆိုတဲ့ အယူအဆကြီး ကလည်း မှားယွင်းနေတဲ့ အယူအဆဆိုတာကို မီးမောင်းထိုးပြချင်တယ်။ ”

ဆရာမဒေါ်အိအိညိမ်းကို ဂုဏ်ပြုလက်မှတ်အပြင် ဂုဏ်ပြုဆုငွေတွေကိုလည်း ချီးမြှင့်သွားဖို့ ရှိနေပါတယ်။ မြန်မာနိုင်ငံလုံးဆိုင်ရာဆရာ၊ဆရာမများအဖွဲ့ချုပ်အနေနဲ့ နှစ်စဉ်ကမ္ဘာ့ဆရာများနေ့ ကျင်းပလာခဲ့တာ ဒီနှစ်ဆိုရင် ပဉ္စမအကြိမ်မြောက်ဖြစ်ပါတယ်။ တတိယအကြိမ်ကစပြီး MTF မီးအိမ်ရှင်ဆရာဆုတွေပေးအပ်ခဲ့ရာ အခုနှစ်ရဲ့ မီးအိမ်ရှင် ဆရာဆုကိုတော့ ပခုက္ကူမြို့နယ် အရှေ့သီရိရွာက ဆရာမ ဒေါ်အိအိညိမ်းကို ရွေးချယ်တာ ဖြစ်ပါတယ်။

ဆုစတင်ပေးအပ်တဲ့ ပထမအကြိမ်တုန်းက ကဗျာရွတ်ဆိုသင်ကြားရာမှာ ထူးချွန်တဲ့ ပေါက်မြို့နယ်က ဆရာမ ဒေါ်မြင့်မြင့်ဇော်နဲ့ ကချင်ပြည်နယ်က တိုက်ပွဲတွေကြား ကလေးတွေကို ကာကွယ်ပြီး ဒဏ်ရာရရှိခဲ့တဲ့ ဒေါ်ဂူပါငယ်ကို ပေးအပ်ခဲ့ပါတယ်။ မနှစ်ကတော့ မှော်ဘီမြို့နယ်က ကျောင်းသားတဦး ကားအတိုက်ခံရမယ့်အရေးကို ကာကွယ်ပေးရင်းနဲ့ ကိုယ်တိုင်ကားတိုက်ခံရပြီး သေဆုံးသွားခဲ့တဲ့ ဆရာမဒေါ်သန်းသန်းဌေးကို ချီးမြှင့်ခဲ့ပါတယ်။

အလားတူ ကမ္ဘာ့ဆရာများနေ့အဖြစ် ထိုင်းနယ်စပ်တလျှောက်က ဒုက္ခသည်စခန်း တွေမှာလည်း အခမ်းအနားတွေကျင်းပကြပြီး ဒီနှစ်မှာလည်း ဆရာသက်တမ်း ၅ နှစ်၊ ၁၀နှစ်နဲ့ ၁၅ နှစ်ရှိတဲ့ ဆရာတွေကို ဂုဏ်ပြုမှတ်တမ်းလွှာပေးအပ်ခဲ့ပါတယ်။ ဒီနေ့ကျရောက်တဲ့ ကမ္ဘာ့ဆရာများနေ့မှာ နယ်စပ်ဒုက္ခသည်စခန်းတွေနဲ့ တိုင်းရင်းသား ဒေသတွေက ဆရာဆရာမတွေကို အစိုးရအနေနဲ့ အသိအမှတ်ပြုဖို့လည်း ကရင်နီပညာရေးဌာန ညွှန်ကြားရေးမှူး ဆရာမ အဲလစ်စဘတ်မီမာ ကပြောပါတယ်။

“ပြောချင်တာကတော့ ကျမတို့ ဒုက္ခသည်စခန်းနဲ့ တိုင်းရင်းသားဒေသတွေမှာ တာဝန်ထမ်းဆောင်နေတဲ့ ဆရာ၊ ဆရာမတွေကို မြန်မာအစိုးရဖြစ်စေ၊ တခြားနိုင်ငံတကာ အဖွဲ့အစည်းကနေပြီးတော့မှ အသိအမှတ်ပြုပေးစေချင်တာပေါ့နော်။ ဒုက္ခရောက်နေတဲ့ လူထုတွေအတွက်၊ ကလေးသူငယ်တွေအတွက် တဖက်တလမ်းကနေပြီးတော့မှ ပါဝင်ပေးဆပ်သွားတဲ့ဆရာ၊ ဆရာမတွေ ရှိနေကြောင်းကို အစိုးရနဲ့ နိုင်ငံတကာကို အသိပေးစေချင်ပါတယ်”

အောက်တိုဘာ ၅ ရက်နေ့ကို ကမ္ဘာ့ဆရာများနေ့အဖြစ် ကုလသမဂ္ဂက ၁၉၉၄ ခုနှစ်ကတည်း က သတ်မှတ်နှစ်စဉ်ကျင်းပတာဖြစ်ပါတယ်။

Credit: DVB Burmese

Leave a Reply