Sun. Jun 16th, 2019

အချိန်မဖြုန်းစေချင်ပါ ( ဗန်းမော်သိန်းဖေ )

လူရွယ်တစ်ယောက်က သူ့ဘ၀ကို စိတ်ပျက်နေတယ်။ သူဟာ ကြီးပွားအောင်မြင်သူတစ်ယောက် ဖြစ်ချင်တယ်။ အိမ်ထောင်ပြုပြီး သားသမီးတွေနဲ့ ပျော်ပျော်ပါးပါး နေချင်နေတယ်။ လောလောဆယ်မှာ သူဟာ ဘွဲ့တစ်ခုရပြီး ကုမ္ပဏီတစ်ခုမှာ လစာနည်းနည်းလေးနဲ့ အလုပ်လုပ်နေရတယ်။ ရာထူးတိုးဖို့ အခြေအနေလည်း မရှိဘူး။ လစာမလုံလောက်လို့ အိမ်ထောင်ပြုလို့ မဖြစ်ဘူး။ ဘာကြောင့်လဲဆိုတော့ သူ့ချစ်သူကို ဆင်းဆင်းရဲရဲ ဘ၀မှာ မနေစေချင်ဘူး။ သူဟာ သူ့ဘ၀ကို သက်သက် အချိန်ဖြုန်းနေတယ်လို့ ထင်နေတယ်။ ဒါပေမဲ့ သူ ဘာလုပ်ရမှန်း မသိဘူး။

ရက်တွေကနေ လ၊ လတွေကနေ နှစ်တွေ ကူးလာတယ်။ သူဟာ အဲဒီအခြေအနေအတိုင်းပဲ ဖြစ်နေဆဲပါပဲ။ တစ်ရက်မှာ သူ့ခေါင်းထဲမှာ အကြံတစ်ခု ပေါ်လာတာကြောင့် အဲဒီအကြံကို အကောင်အထည် ဖေါ်လိုက်တယ်။

သူဟာ ကုန်စုံဆိုင်တစ်ခုကို သွားပြီး ဖန်ချိုင့်တစ်လုံးနဲ့ ရောင်စုံဂေါ်လီလုံးတွေပါတဲ့ အထုတ်တွေကို ၀ယ်လိုက်တယ်။ အိမ်ပြန်ရောက်တာနဲ့ စားပွဲမှာ ထိုင်လိုက်ပြီး လက်ရှိအချိန်ကနေ သူအလုပ်နားတဲ့အချိန်ထိ (အသက် ၆၀ လောက်ပေါ့) စနေနေ့ပေါင်း ဘယ်လောက်ကျန်သလဲဆိုတာကို တွက်ကြည့်လိုက်တယ်။ တွက်လို့ရတဲ့ စနေအရေအတွက်နဲ့ ညီမျှတဲ့ ဂေါ်လီလုံး အရေအတွက်ကို ဖန်ချိုင့်ထဲကို အသာလေး ထည့်လိုက်တယ်။

ပထမဆုံး စနေနေ့မနက်ရောက်တော့ သူဟာ ဖန်ချိုင့်ထဲက ဂေါ်လီလုံးတစ်လုံးကို နှိုက်ယူလိုက်တယ်။ ပြီးတော့ ဂေါ်လီလုံးကို လက်ဖ၀ါးပေါ်မှာ တင်ထားပြီး စူးစိုက်ကြည့်ရင်း သူ့ကိုယ်သူ ခုလို မေးခွန်းတွေ မေးလိုက်တယ်။
– ပြီးခဲ့တဲ့ တစ်ပတ်က ငါ ဘာလုပ်ခဲ့သလဲ
– ငါ ဘာတွေ လေ့လာတတ်မြောက်ခဲ့သလဲ
– ငါ့ပတ်ဝန်းကျင်က လူတွေကို ငါ ဘာတွေ အကျိုးပြုခဲ့သလဲ
– ငါ့ရည်မှန်းချက်ပန်းတိုင်ကို ရောက်ဖို့ ငါ ဘာတွေ လုပ်ခဲ့သလဲ
– ငါ့မှာ ရှိတဲ့ အရည်အချင်းတွေထဲက ဘယ်ဟာတွေကို အသုံးချခဲ့သလဲ
– ပြီးခဲ့တဲ့ အပတ်ဟာ ငါ့ကို အကျိုးရှိစေခဲ့သလား။ ငါ အချိန်ဖြုန်းခဲ့တာလား

ပြီးတော့ သူဟာ လာမယ့်အပတ်အတွက် ခုလို မေးခွန်းတွေ မေးပြန်ပါတယ်။
– လာမယ့်အပတ်ကို ငါ အကျိုးရှိအောင် ဘာတွေ လုပ်မလဲ
– ဒီအချိန်အတွင်း လုပ်ဖို့ အရေးကြီးဆုံး အရာတွေက ဘာတွေလဲ
– ငါ ဘယ်သူတွေကို ကူညီပေးရမလဲ
– ငါ ပြဿနာတွေကို ဘယ်လို ဖြေရှင်းမလဲ
– ငါ ကြောက်နေတာတွေဟာ ဘာတွေလဲ၊ အဲဒါတွေကို ဘယ်လို ဖြေရှင်းမလဲ
– ငါ့မှာ ရှိတဲ့ အရည်အချင်းတွေထဲက ဘယ်ဟာတွေကို အသုံးချမလဲ

သူဟာ အဲဒီမေးခွန်းတွေကို မေးပြီး လေးလေးနက်နက် စဉ်းစားတယ်။ အဖြေတွေ ရပြီဆိုတာနဲ့ လက်ဝါးပေါ်က ဂေါ်လီလုံးကို အမှိုက်ပုံးထဲ ပစ်ထည့်လိုက်တယ်။ သူ့ ဖန်ချိုင့်ထဲက ဂေါ်လီလုံးတစ်လုံး လျော့သွားပြီ။ ဒါပေမဲ့ မသိသာပါဘူး။

သူဟာ အဲဒီအကျင့်ကို စနေနေ့တိုင်း မပျက်မကွက် လုပ်နေတယ်။ လပေါင်းအတော်ကြာလာတဲ့အခါမှာ ဖန်ချိုင့်ထဲက ဂေါ်လီလုံးတွေဟာ အတော်ကြီးကို နည်းသွားပြီ။ အဲဒါကို မြင်တဲ့ သူ့အတွက် အချိန်သိပ်မကျန်တော့ဘူးဆိုပြီး သူ လုပ်စရာတွေကို အချိန်မဖြုန်းဘဲ လုပ်တယ်။

သူဟာ အသက် ၄၀ ကျော်လောက်မှာပဲ ကြီးပွားအောင်မြင်တဲ့ လုပ်ငန်းရှင်တစ်ယောက် ဖြစ်သွားတယ်။ သာယာတဲ့ အိမ်ထောင်တစ်ခုကို တည်ဆောက်ပြီး ဘ၀မှာ ပျော်ရွှင်စွာ နေနေပါတယ်။

မိတ်ဆွေ ရည်မှန်းချက်ပန်းတိုင် မရှိဘဲ အပျော်အပါးတွေနဲ့ အချိန်တွေ ဖြုန်းနေသလား။ မိမိကိုယ်မိမိ အသိဆုံးပါ။ ဒါပေမဲ့ တစ်ခု သတိပေးလိုက်ပါမယ်။ အသက်ကြီးမှ ဆင်းဆင်းရဲရဲ နေရပြီး နောင်တမရချင်ရင် အခုအချိန်က စပြီး အချိန်ကို အကျိုးရှိအောင် အသုံးချပါ။

Leave a Reply

This site uses Akismet to reduce spam. Learn how your comment data is processed.

Copyright © All rights reserved. Newsphere by AF themes.